Impaganetget ni Department of Public Works and Highways Secretary Manuel Bonoan a saan isuna a nagbenepisyar wenno nairanod kadagiti naibutaktak a ghost projects ti pagilian.
Segun ti sekretaryo, awan ti ammo na kadagiti nasao a proyekto ken awan ti koneksyon na kadagiti opisyal ti DPWH a nangipatungpal kadagitoy, pakairamanan dagiti contractors.
Immunan a naibutaktak iti ghost project idiay Baliuag, Bulacan kalpasan ti insayangkat nga inspeksion ni Presidente Ferdinand Marcos Jr.
Addaan daytoy ti project description a ‘Construction of Reinforced Concrete River Wall’ ken addaan ti actual address a Purok 4, Barangay Piel, Baliuag, Bulacan. Napondoan ti 60 million pesos babaen ti 2025 National Budget ken pakabuklan a P55,730,911.60 iti contract cost ti nangabak a contractor nga Syms Construction Trading, bayat nga iti Bulacan 1st District Engineering Office met iti nangipatungpal ti proyekto.
Sumagmamano pay a flood control projects ti probinsya iti maibilbilang itan kas “ghost project”, ngem kenuna ni Secretary Bonoan nga am-amirisen ti ahensiya dagiti proyekto ken sigurado iti panangipataw ti dusa para kadagiti siasinoman a maduktalan a responsable wenno nairanod.
Bayat a madama ti imbestigasyon, addan dagiti district engineers ti napatawan ti preventive suspension.#
