BR LA UNION – Narurod ni Public Works and Highways Secretary Vince Dizon kadagiti naimatangan na a flood control projects ditoy probinsiya ti La Union, a nakitaan ti problema, inawaganna a ‘super substandard’ iti inusar a materyales, ken saan pay a naileppas a proyekto wenno palpak.
Dismayado ni Sec. Dizon ken imbaga na nga awan ti nagdumaan daytoy kadagiti immunan a palpak ken substandard a flood control projects idiay Bulacan ken Mindoro.
Iti panagturong da Sec. Dizon ken Baguio City Mayor ken Independent Commission for Infrastructure Special Adviser Benjamin Magalong idiay Bauang, La Union partikular iti Acao-Calumbaya bridge, nakakad-kadlaw kunana iti panangiyapura dagiti maseknan a mangileppas kadagiti proyekto, idinto nga substandard iti nausar a landok ken peke a tubo.
Maysa pay a nakita dagiti dua nga opisyal a problema iti riprap ken dike construction idiay Bauang ket awan ti kopya ti engineering plan iti foreman daytoy.
Impaganetget ti sekretaryo a kasapulan nga imbestigaran a naimbag iti nadakamat a proyekto ken mapagsungbat dagiti tao nga adda ti likudan ti palpak a proyekto.
Innayon na pay a makaparurod dagiti natakuatan na nga irregularidad kadagiti proyekto nga agpaay kuma kadagiti umili.
Ket rumbeng laeng kunana iti nalawa a ‘cleansing’ iti sibubukel a departamento ken pagsungbaten dagiti opisyal ken kontratista a mapaneknekan nga adda pakainaigan na kadagiti anomalya ken korapsiyon iti proyekto ti gobierno.
