BR LA UNION – Nakaawat ti kritisismo ni Senador Ronald “Bato” Dela Rosa iti social media gapu kadagiti makainsulto a waragawagna kenni Akbayan Party-list Representative Perci Cendaña, a naamwan a maysa nga stroke survivor.
Maipalagip nga imbaga ni Dela Rosa, a “sippangolen na ni Cendaña tapno agsimpa ti rupa na” a nangipangato iti kiday ti publiko, gaputa ibilang da a dakes nga angaw daytoy nangruna ket maysa nga stroke survivor ti nangibagaanna.
Simmungbat ni Cendaña ket inlawlawagna iti social media, a ti panag-piwis ti rupana ket gapuanan ti pannaka-istrok na.
Iti maysa a Facebook post, kinunana, ”TABINGI ANG MUKHA’ ko dahil ang ‘BAKLANG NGIWI’, na ito ay stroke survivor.
Inallokoy ti kongresista ni Dela Rosa nga ipakitana ti kinatured nga impamatmat na, iti panangsungbat kadagiti agresibo nga aramid ti China idiay West Philippine Sea (WPS) ken iti panagsangona iti International Criminal Court (ICC), a mangisay-sayangkat ti imbestigasyon iti war on drugs ti sigud nga administrasiyon Duterte.
Kabayatanna, nangiruar met ti public apology ni Dela Rosa ita nga aldaw ti Domingo, ken inawatna ti responsibilidad iti imbagana.
‘The past few days have weighed heavily on Filipinos, especially sa aming mga Mindanaoans at ibang Cebuano speaking people. Maraming nagalit, at dahil sa nag-empathize ako sa galit nila, nakapagbitiw ako ng mga salitang hindi maganda at nakapanakit ng damdamin ng iba,’ kinuna ni Dela Rosa
Innayonna, ‘I apologize for what I said and did, particularly in failing to see the bigger picture. My apologies to Congressman Perci Cendaña for my offensive comments on his person. I wish him good health. I make no excuses and I take full responsibility for the hurt my words have caused.’
Nagramot ti susik iti baetan ti dua a kampo kalpasan nga inyendorso ni Cendaña ti umuna nga impeachment complaint nga indatag dagiti civil society organizations, religious leaders, sectoral representatives, ken pamilya dagiti biktima ti extrajudicial killings kontra kenni Vice President Sara Duterte idi Disiyembre 2, 2024, gapu kadagiti akusasyon a culpable violations of the Constitution, graft and corruption, bribery, betrayal of public trust, ken dadduma pay a nadagsen a krimen.
Iti udi, nalukay nga inawat ti kongresista ti panagpakawan ti senador ket kinunana, ‘Agserbi koma daytoy a napateg a leksiyon, a ti pudno a lider ket saan laeng a nabileg ngem ketdi maseknan pay, tapno pagtalinaedenna ti kinatao ken political discourse rationale, ken ti awag a responsibilidad ket saan a personal nga atake iti siasinuman ngem ketdi responsabilidad iti amin nga umili.’
