Nagkiddaw ti dispensa ni Senador Erwin Tulfo kadagiti pada na a senador a miembro ti grupo ni Senador Alan Peter Cayetano kalpasan iti nagbalin a waragawag nga ipaarestar ken ipaguyod na ni Cayetano no mangisayangkat manen ti maipagarup a saan nga otorisado a panagdingngeg.
Iti maysa a waragawag, inaklon ni Tulfo a saan a nasayaat para iti maysa nga opisial ti gobierno, kangrunaan iti maysa a senador, iti nakaro a panagsao na. Kenuna a naigawid laeng isuna ti tarigagay a maituloy iti trabaho ti Senado nga awan ti pannakasinga.
Nagkiddaw met isuna ti dispensa kadagiti umili a Pilipino gapu kadagiti napaspasamak iti Senado a nagtennag iti pannakatantan ti panagpasa ti napapateg a singasing-linteg.
Segun kenni Tulfo, gapu iti nagsasaruno a tension ti nagsinnungbangir a dasig, nalpas dagiti sesyon nga awan ti naisaysayangkat a napateg a legislative action. Innayon na pay nga arigna naparalisa iti mandato ti Senado gapu iti awan patinggana a susik iti pulitika.
Nagpanawagan ti senador kadagiti kakaduana a gibusanen iti saan a panagkinnaawatan ken agtitinnulong tapno maituloy iti panagaramid ti linteg ken panangisayangkat dagiti imbestigasion para iti pagsayaatan ti publiko.
Impaganetget na nga iti panagkaykaysa ket saan a kaipapanan ti panagsuko kadagiti ilablaban, no di ket pagtitipon tapno masalakniban iti interes ti pagilian ken ti umili a Pilipino.###
