BR LA UNION – Naipadamag a saan a pirmaan ni Senador Panfilo “Ping” Lacson ti ratipikasyon ti 2026 budget bill nu ilungalong ti bicameral conference committee a mailatangan ti pondo dagiti kontrobersiyal nga id programs, nga immunan a binabalawna kas baro a rupa ti “pork barrel.”
Karaman kadagiti banag a binabalaw ti Senador ket ti kontrobersiyal a P51 billion a pondo para iti Medical Assistance to Indigent and Financially Incapacitated Patients (MAIFIP) ti Department of Health (DOH).
Impaganetget ti senador a nasken a maitunos ti nasao a pondo kadagiti programa ti Universal Health Care kas iti pannakasakop ti amin a barangay ken masiguro ti zero billing.
Segun kenni Sen. Lacson, dagiti guarantee letters manipud kadagiti pulitiko ket manglukat laeng iti dalan para iti patronage politics imbes a maipangruna ti kasapulan a pannakataripato ti salun-at dagiti Pilipino, nangruna dagiti marigrigat.
Inrekomendar ti Senador a mabalin pay laeng a maipatungpal dagiti safeguards babaen ti special provisions bayat nga agtultuloy ti bicam deliberations, partikular tapno malapdan ti pannakakontrol dagitoy a pinansiyal a tulong no awan ti umno a panangtingiting.
Maysa pay a dinakamat ti Senador a nangkumbinsir kenkuana a saan a pirmaan ti budget ratification ket ti proyekto ti Department of Agriculture a farm-to-market roads, agsipudta doble manipud iti kidkiddawen ti Presidente nga allocation ti bicam a P33 billion.
Iti agdama, agtultuloy ti panagtunos ti bicam kadagiti pinal a probisyon ti 2026 budget bill.
