BR LA UNION – Kinuwestiyon ni Senador Rodante Marcoleta iti kabaelan ni Batangas Rep. Leandro Leviste nga ipalawag iti linaun ti nabirngasan a “Cabral Files” iti tengnga ti imbestigasyon ti Senado iti maipagarop nga anomalya iti flood control projects.
Segun kenni Marcoleta, maipagarop nga awan ti “personality” ni Leviste tapno tumestigo seknan iti substansiya dagiti dokumento agsipudta saan a paset ti Department of Public Works and Highways ken awan pakainaigan na iti panangisagana dagiti report, konsolidasyon dagiti datus, wenno dokumento nga adda pakainaiganna iti badyet.
Impaganetget ti Senador a limitado laeng iti testimonya ni Leviste nu kasatno na a naala dagiti dokumento, a makuna a naggapo iti opisina ti natay a DPWH Undersecretary Catalina Cabral.
Manipud iti legal nga opinyon, maipagarop a saan a maiparbeng nga agpalawag ni Leviste seknan kadagiti linaun ti file.
Imbaga pay ni Marcoleta nga adda sumagmamano nga opisyal ti DPWH a nagkedked a mangkumpirma iti kina-balido dagiti dokumento nga ikot ni Leviste.
Inaramid ti senador iti waragawag kasaruno ti kadawatan ni Senate President Pro Tempore Panfilo Lacson kenni Leviste a talantanen ti maikadwa a batch dagiti dokumento a na-authenticate ti DPWH.
Kabilang ni Leviste kadagiti na-imbitaran iti panagdengngeg ti Senate Blue Ribbon Committee idi Lunes a nangsukimat iti “Cabral Files,” a maipagarop a mangibutaktak ti posible a budget insertions iti 2025 national budget.
