Nagpanawagan ni Senator Francis “Kiko” Pangilinan iti Philippine National Police (PNP) nga itandudo iti maximum tolerance ken raemen ti karbengan dagiti umili a mangisayangkat iti nakapia a tignay-protesta.

Impaganetget iti senador a nasken nga agtalinaed iti kinatalged ken seguridad a saan a malablabsing iti karbengan ti tunggal Pilipino a nawaya a mangipeksa kadagiti karirikna da.

Segun kenni Pangilinan, pada metlaeng a Pilipino dagiti pulis ken ralyista nga addaan iti maymaysa a tarigagay – iti kaadda iti disente a pagbiagan, natalged a komunidad, ken napintas a masakbayan para iti pamilya.

Gapo kadaitoy ket pinaregta na dagiti pulis a sangwen dagiti demonstrador nga addaan iti panangawat, panaglapped, ken panagraem.

Impaganetget na a saan a rumbeng nga ibain iti agprotesta iti kangitingitan dagiti nagduduma a gangganaet a lider ken delegado para iti ASEAN Summit.

Imbes kunana, gundaway daitoy tapno ipakita iti international community a paset iti demokrasya ditoy Pilipinas iti nawaya a panagwaragawag ken panagraem iti nagduduma a perspektibo.