Bulgar ken nainget a pinaglibakan ni Senator Sherwin “Win” Gatchalian a kummiddaw isuna iti Department of Public Works and Highways (DPWH) a mangiserrek ti proyekto iti sidong ti 2025 national budget.
Mainaig daitoy kadagiti agwarwaras a dokumento a pagaammo kas “DPWH leaks,” nu sadino ket nakalanad dagiti listaan dagiti senador — karaman ni Gatchalian — nga addaan kadagiti kiniddaw a proyekto a naisingit iti 2025 budget.
Impaganetget ni Gatchalian nga iti intero a termino na a kas senador ket saan a pulos a kummiddaw isuna ti aniaman a proyekto ti DPWH. Saan na met pulos a nakita wenno nakapatang ni sigud a DPWH Undersecretary Maria Catalina Cabral manipud idi nabotosan isuna kas senador.
Imbatad ti Senador nga awan ti kredibilidad ken saan a mapaneknekan dagiti nasao nga alegasyon kontra kenkuana.
Inlawlawag na pay a nu adda dagiti local government units (LGU) a kumidkiddaw ti tulong kenkuana, ti araramiden da laeng ket i-refer dagitoy ti maiyannatop nga ahensya, agsipud ta limitado ti papel dagiti mamanday-linteg ken awan iti kontrol da ti tunggal addang ti ahensya.
