BR LA UNION – Dua pay nga imbestigasyon wenno hearing seknan iti multibillion-peso flood control corruption scandal iti iganwat ti senate blue ribbon committee iti sumaruno a bulan, segun kenni Acting Chairperson Senator Erwin Tulfo.
Inyanunsiyo ni Tulfo iti tentative schedule para iti sumaruno a hearing, daytoy ket inton November 10, kalpasan ti makabulan a bakasyon ti senado.
Segun kenni Tulfo, mangiparang da ti partial committee report inton agsubli ti sesyon ken posible a marugyan ti sabali nga imbestigasyon seknan iti nausar a pondo dagiti farm-to-market road (FMR) projects iti sidong ti Department of Public Works and Highways.
Kabayatanna, imbatad ni Sen. Sherwin Gatchalian, agdama a chairperson iti Senate Committee on Finance, nga inrekomenda na iti Senate Blue Ribbon Committee ken iti Independent Commission on Infrastructure (ICI) nga imbestigaran metten iti nadiskubre nga overpriced a farm to market roads ti DPWH.
Segun kenni Gatchalian, adda met laeng dagiti nadiskubre a ghost projects ken panag-overprice a farm-to-market road projects.
Impaganetget ti senador a nalugi iti gobyerno ti P10.3 bilyon manipud iti 700 kilometers a farm-to-market roads gaputi inaramid nga overpricing idi 2023 agingga 2024.
Dandani amin a proyekto ti farm-to-market roads a nakailatangan ti pondo ket manipud Region 5 wenno Bicol Area ken Region 7 wenno Leyte area.
Manipud iti top 15 contractors a dinakamat ti Presidente, tallo ditoy iti nakita a top contractor iti nasao a proyekto, a pakaibilangan ti construction company ti kabsat ni sigud a congressman Zaldy Co nga Hi-Tone Construction.
