BR LA UNION – Kinuwestiyon ti minority bloc iti maipagarop a darasudos a proseso iti panang-amyendar ti Senate rules.
Kasaruno daytoy iti panag-walkout ti minority bloc idi Martes, Mayo 26, kalpasan ti nabara a diskusyon seknan iti panang-amyendar ti Senate rules a mangipalubos kadagiti senador a dumar-ay ken agbotos iti plenaryo babaen ti online wennno remote participation.
Ti gakat ket indatag ni Senador Rodante Marcoleta idi Mayo 11, nga addaan tarigagay nga ipalubos iti “justifiable” a remote attendance dagiti miyembro ti Senado.
Segun iti minority bloc, maiyap-apura iti proseso ti panang-amyendar iti rules ken saan a maipapaayan ti naan-anay a gundaway ti amin a senador a mangipeksa ti bukod da nga opinyon.
Iti waragawag nga imbinglay iti social media ni Sen. Kiko Pangilinan, impaganetget na a rumbeng nga ipasidong iti mas nalawa a panangtalantan, saan ketdi nga iyapura nga ipatungpal.
Mainaig ti daytoy, tinakderan ti Minorya nga arigna adda mapaspasamak a “railroading” wenno panangapura iti proseso ket nagballaag da a mabalin a maapektaran ti patas a pannakipaset dagiti senador iti panagputar ti linteg.
Arigna na met nga impasagid ni Sen. Rodante Marcoleta kenni Sen. Risa Hontiveros a narigat nu awan ti legal background kalpasan a kwinestyon ni Hontiveros nu apay nga ilunglungalong ti mayorya ti binnotosan idiay Senado nu saan pay a nabukel iti Committee on Rules.
Dagus a sinita ni Sen. Erwin Tulfo iti inwaragawag ni Marcoleta, ket kinuna na nga ‘Ad Hominem.’ Saan a rumbeng nga ibaga ti kadwa a senador nga awan ti ammo da iti linteg.
Gaputi panag-walkout, napaay iti plenaryo a makabukel ti quorum isunga saan a nasurot ti gakat agingga a nag-adjourn ti sesyon ken maituloy inton Hunyo 1.
