BR LA UNION – Inaprubaran ti Senate panel idi kalman, Lunes iti gakat a mangitantan iti Barangay ken Sangguniang Kabataan Elections (BSKE) 2026 ken aramiden a lima a tawen iti termino dagiti barangay ken SK officials.
Segun kenni Senator Francis ”Chiz” Escudero, ranta ti gakat a maurnos iti termino dagiti barangay ken SK officials tapno saan a kanayun a baliwan wenno aramiden a rason tapno itantan iti eleksiyon.
Iti sidong ti Senate Bill No. 2387, tarigagay ni Escudero a ma-amyendaran iti Republic Act No. 12232 ken aramiden a lima a tawen, manipud iti agdama nga uppat a tawen a termino dagiti Barangay ken SK officials.
Kabayatanna, nangidatag met ni Senator Imee Marcos ti Senate Bill No. 2067, nga addaan panggep nga itantan iti BSKE manipud Nobyembre 2026 a maisayangkat inton Oktubre 2027.
Nakatuding a maisayangkat ti eleksiyon inton Nobyembre 2, 2026.
Kabayatanna, nagpanawagan ni Commission on Elections (Comelec) Chairperson George Garcia a maaddaan ti nalawag a desisyon iti kabiitan a panawen nu matuloy wenno itantan ti BSKE.
Segun kenni Garcia, nasken a maamwan iti agbalin a desisyon sakbay nga agtapos ti Setyembre, agsipudta naituding ti filing of candidacies manipud Setyembre 28 agingga Oktubre 5.
Nasay-sayaat kunana nu malawlawagan iti isyu agingga iti maikadwa a lawas ti Setyembre tapno makapagsagana dagiti kandidato a kayatna ti tumaray kasta metten dagiti field personnel ti Comelec.
