BR LA UNION – Inlawlawag ni Senate Blue Ribbon Committee Chairman Senador Ping Lacson iti agwar-waras a ladawan a kadwa na ti agassawa a contractor nga isuda Curlee ken Sarah Discaya.
Segun kenni Lacson, naala ti ladawan idi maudi a lawas ti Abril, kagiddan iti panagleppas ti 90-day campaign period para iti 2025 midterm elections.
Sakbay dayta, bimmisita iti opisina na idiay Taguig ti campaign supporter manipud Davao a ni Fred Villaroman, kadwa na ti anak ti pamilya Discaya, a nang-imbitar kenkuana tapno dumar-ay iti maysa a grand rally idiay Davao.
Simmaruno a simmangpet iti agassawa a Discaya ken nagpaut laeng ti 15 agingga 20 a minuto ti panagsasarita dagitoy.
Innayon ni Lacson, sirerespeto a kinedkedan na iti imbitasyon a dumar-ay iti rally, kas panangrespeto ti gayyem na a ni Senate President Tito Sotto III, agsipudta ti kaanakanna a ni Mayor Vico Sotto ket kalaban dagiti Discaya iti kina-mayor.
Impaganetget pay ti senador a saan na a personal nga am-ammo ti pamilya Discaya, ken dayta laeng ti umuna ken maudi a gundaway a nagkakadwa da, sakbay a rimwar iti imbestigasyon ti Blue Ribbon Committee.
