Agtalek ti abogado dagiti biktima ti extrajudicial killings (EJKs) nga adayo a bigbigen ti International Criminal Court (ICC) ti Senate resolution para ti house arrest ni sigud a Presidente Rodrigo Duterte.

Daitoy ti waragawag ni Atty. Kristina Conti kasaruno ti impila a resolusyon ni Senador Alan Peter Cayetano idiay Senado a panggep a maipasidong ti house arrest ti sigud a Presidente kabayatan ti panaguray na iti panagdengngeg ti kaso na a crimes against humanity inton Setyembre 23.

Sumagmamano kadagiti nadakamat a basaran ti resolusyon ket ti kumapkapsoten a salun-at ni FPRRD gapo iti kinalakay na ken nabayag nga social isolation a nakaro a nakaapektar ti kasasaad ti emosyon na.

Ngem segun kenni Atty. Conti, awan met iti aniaman a pammaneknek iti medical status ti sigud a presidente iti naipila a resolusyon gapo ta saan met a personal a nabisita isuna ni Sen. Cayetano.

Namaymayat kuna ti abogado nu adda iti maipresentar a “facts” ken malaksid ta awan ket agparparang pay a maysa a klase daitoy ti “political posturing” iti maysa a sangay ti gobyerno wenno tapno makagun-od iti “political support” babaen ti emosyonal a panag-apela.

Inlawlawag na nga uray anya nga aspeto ket saan a bigbigen ti international tribunal ti resolusyon nga kunana ket arig na makibibiang payen iti proseso da.

Innayon na pay a ti kiddaw ti kampo ti sigud a presidente para ti interim release ket saritaan iti nagbaetan dagiti prosecutors kakadwa ti defense ken kadagiti hukom.

Nagtaud iti nasao a resolusyon idi imbutaktak ni Bise Presidente Sara Duterte ken ni Senador Bong Go a ti sigud a presidente ket nakutkuttongen kabayatan ti kaadda na sadiay detention facility ti ICC idiay The Hague, Netherlands.