LUNA, LA UNION – Inyusuat ti Local a Gobierno ti Luna ti dakkel a panangipaay ti serbisio iti Barangay Rimos #2 idi Abril 21, 2026, babaen ti programa nga Operation Big Heart (OBH), kas paset ti nainget a kampania tapno mayasideg dagiti kangrunaan a serbisio kadagiti umili.
Iti panangidaulo ni Mayor Gary N. Pinzon, namimpinsan nga impakita ti lokal a gobierno ti panagkumitna iti serbisio publiko babaen ti panangyegda kadagiti libre a serbisio ti salun-at ken dadduma pay a tulong a direkta iti komunidad, nangruna kadagiti umili nga addaan limitado a kabaelan nga agbiahe iti sentro ti ili.
Tampok ti aktibidad ket ti LGU’s Doctor to the Barrio Initiative, a ginasut nga umili ti nabenepisiaran iti libre a medical consultation, blood pressure monitoring, screening para iti nadumaduma a sakit, ken preventive services.
Personal a nangasiwa ni OIC Municipal Health Officer Dra. Jessa Mae Vallejo agraman dagiti healthcare workers, ti personal a nangimaton iti pannakaipaay dagiti kangrunaan a serbisio iti komunidad, agraman ti panagsarua, panateng, hypertension, ken dadduma pay a kasasaad.
Naipakat met ti Mobile Clinic a nangipaay iti libre nga X-ray ti barukong ken pulmonary screening, nangnangruna para iti nasapa a pannakaduktal dagiti sakit ti bara a kas iti tuberculosis. Dakkel ti naitulong daytoy kadagiti umili gapu ta saandan a kasapulan ti agbiahe kadagiti ospital wenno diagnostic center iti ili.
Malaksid iti serbisio medikal, nagbalin ti Barangay Rimos #2 a one-stop service hub iti dayta nga aldaw, a nangipasdekan dagiti nadumaduma nga opisina ti munisipio iti bukodda a serbisio. Adda assistance desk para kadagiti pakaseknan iti civil registry, serbisio ti social welfare, ken dadduma pay a programa ti pagbiag ken pinansial a tulong.
Kabayatanna, nangisayangkat met dagiti personnel manipud iti Philippine National Police (PNP) ken Bureau of Fire Protection (BFP) iti information drive. Napagsasaritaan ditoy dagiti napateg a topiko kas kadagiti estratehia ti pananglapped iti krimen, pannakaammo iti kontra-illegal a droga, panagsagana iti didigra, ken dagiti addang iti kinatalged iti uram tapno mapatibker ti pannakaammo ken panagsagana ti komunidad para kadagiti pangta iti seguridad ken kinatalged.
Segun iti LGU, saan laeng a simple a programa ti serbisio ti Operation Big Heart no di ket napateg nga addang tapno mapatibker ti relasion ti gobierno ken umili. Panggepna ti mangbangon iti ad-adda a makaammo, nakasagana, ken naandur a komunidad babaen ti agtultuloy a panangipaay kadagiti serbisio a direkta a mangsungbat kadagiti kasapulan ti tunggal barangay.
Iti agtultuloy a pannakaipatungpal dagiti kastoy nga inisiatiba, namnamaen ti Gobierno Lokal ti Luna a nalaklaka ti pannakagun-od dagiti umili iti serbisio medikal ken tulong ti gobierno, bayat a maksayan ti gastos ken rigat ti panagbiahe para kadagiti umili—nangruna kadagiti nasulinek a lugar. (Report by Bombo Ericka)
Photo Courtesy:LGU Luna La Union
