LA UNION – Nangiyuswat ti maysa a signature campaign iti National Union of People’s Lawyers (NUPL) a mangallokoy kenni President Ferdinand Marcos Jr. nga ipaayan ti clemency iti Pinay nga adda iti death row idiay Indonesia a ni Mary Jane Veloso.
Iti nasao a petisyon ket paset ti “Save Mary Jane Veloso Task Force” ti NUPL nga addaan tarigagay nga ipaayan ti lawag iti narigat a kasasaad ni Veloso ken para iti natalged a panagsubli a ditoy pagilian, kalpasan ti nasurok maysa dekadam a pannakaibalud idiay Indonesia.
Naipaganetget iti petisyon ti kapadasan ni Veloso kas maysa a biktima ti human trafficking ken nakailanad a saan a rumbeng nga ibilang kas kriminal ni Mary Jane ngem ketdi maysa a biktima.
Target ti petisyon a makakalap iti nalawa a suporta, kapad-pada iti signature campaign idi 2015 a nakakolekta ti aganay kagudwa a milyon a pirma iti uneg ti sumagmamano a lawas.
Mainaig ti daytoy, inallokoy ti NUPL dagiti indibidwal iti intero a lubong nga agpirma iti nasao a petisyon.
Maipalagip nga idi napan a tawen, imbaga ni President Ferdinand Marcos Jr. a sikulukat iti panangipaay ti clemency kenni Veloso.
