Sumangsango iti kaso-kriminal ken administratibo ni sigud a Department of Budget and Management (DBM) Secretary Amenah Pangandaman mainaig iti ilegal a panangiyakar ti binilyon a piso a pondo manipud PhilHealth ken Philippine Deposit Insurance Corporation wenno PDIC nga agturong iti National Treasury.
Inihain ni Health reform advocate Doctor Tony Leachon sadiay Office of the Ombudsman iti reklamo kontra kenni Pangandaman para ti mapapati a technical malversation, graft, ken dadduma pay nga administratibo a panaglabsing.
Segun kadagiti reklamo, nasken a mairaman ni Pangandaman a kas respondent gapo iti akem na iti panangaprobar ken panangipatungpal ti kontrobersyal a fund transfer.
Karaman kadagiti isyu iti panangiyakar ti P60-B a surplus budget ti PhilHealth kasta met ti P107-B a pondo ti PDIC iti National Treasury kabayatan nga isuna paylaeng ti Sekretarya ti Department of Budget and Management (DBM).
Naipaganetget pay iti reklamo a paset ni Pangandaman iti “concerted and coordinated governmental action” iti panangimplementar ti fund transfer mechanism nga itan ket topiko dagiti pammabalaw.
Iti agdama ket awan pay iti opisyal a waragawag iti sigud nga opisyal mainaig kadagiti alegasyon.
Idi bulan ti Disyembre ket imbilin ti Supreme Court of the Philippines iti gobierno nga isubli ti budget surplus a P60-B ti PhilHealth babaen ti 2026 General Appropriations Act (GAA).
Manipud iti desisyon ti Supreme Court En Banc, naideklara kas ‘unconstitutional’ ken awanan bileg dagiti dadduma a probisyon iti 2024 GAA ken mainaig a Finance Circular a nagbalin a basaran ti panangiyakar ti pondo gpao iti mapapati a grave abuse of discretion.
Immun-una metten a nangipila ni Dr. Leachon ti reklamo kontra kadagiti dadduma pay nga opisyales ti gobierno, pakairamanan da Executive Secretary Ralph Recto, Acting budget secretary Rolando Toledo, ken dadduma pay nga opisyales ti PhilHealth ken PDIC mainaig ti kapada nga isyu.
Maibasar iti record, dumanon ti P89.9B iti target a maiyakar manipud iti pondo ti PhilHealth, ngem P60B laeng ti aktwal a naiyakar sakbay a nilapdan daitoy iti Korte Suprema.
