BR LA UNION – Nakatuding nga agtestigo ni sigud a Department of Public Works and Highways (DPWH) Bulacan District Engineer Henry Alcantara kontra kenni sigud a Congressman Elizaldy Co idiay Sandiganbayan inton Marso 23 seknan iti binilyon nga anomalya iti flood control projects.
Impaka-ammo ti prosekusyon iti sixth division ti anti-graft court a tumakder kas testigo ni Alcantara.
Maipalagip nga inraman ni Alcantara ni Co kas “top proponent” dagiti insertion iti national budget a nagresulta iti maipagarop a kickback nga agbalor ti P181 milyon.
Iti bilyones a kuwarta ket maipagarop a naitulod kenni Co, a mangpaneknek kadagiti alegasyon ni Alcantara babaen iti ebidensya.
Mairam-raman pay ni Co iti maysa a P289-milyon a kaso ti malversation ken graft idiay Oriental Mindoro, ken maipagarop a nakaawat ti “balato” wenno share ni Usec. Roberto Bernardo manipud kenni Co babaen kenni Alcantara.
Iti agdama, adda iti sidong ti Witness Protection Program (WPP) ti Department of Justice (DOJ) ni Alcantara nga immunan a nagtestigo iti panagdengngeg idiay Senado seknan iti anomaliya dagiti infrastructure projects ti gobyerno.
