Pinasingkedan ti Department of Justice nga agpada a respondent ni Senador Jinggoy Estrada ken ni sigud a Department of Public Works and Highways Secretary Manuel Bonoan iti kaso a ‘plunder’ mainaig kadagiti maanomalya a flood control projects.
Segun kenni Justice Spokesperson Atty. Polo Martinez, karaman iti nasao a sekretario kadagiti pinilaan ti National Bureau of Investigation ti reklamo a plunder gapu iti ammona ti maipagarup nga iregularidad kadagiti proyekto ti gobierno.
Inlawlawag ni Martinez a saan laeng a maipapan iti maymaysa a proyekto iti kaso, no di ket iti takaw a kinabaknang nga aggatad ti nasurok ₱50 million manipud kadagiti nagtitipon a transaksion nga adda pakainaigana ti flood control projects anomaly.
Iti agdama ket awan pay ti nakatuding nga schedule wenno petsa no kano a marugyan iti preliminary investigation seknan ti plunder case.
Imbinglay ti tagapagsarita a maidutok daytoy iti panel of prosecutor a mangiggem ti kaso ken mangidatag ti subpoena.###
