Narigat ton nga isubli ni dati a Presidente Rodrigo Duterte ti imbagana iti pannakadengngeg ti Senate Blue Ribbon Committee mainaig kadagiti kaso ti pammapatay iti sidong ti gubat kontra droga.
Segun kenni Senate President Chiz Escudero, narigaten nga ibaw-ing ni Duterte ti statements na kabayatan ti hearing gapu ta amin dagitoy ket insapata ti dati a presidente.
Kinunana a daytoy ti nagdumaan a nupay awan ti baro iti kinuna ti dati a presidente, inwaragawagna daytoy iti Senado nga “under oath” ken nagsao agingga iti ammona a mabalin nga usaren a pabor kenkuana wenno maibusor kenkuana.
Kinuna pay ti senador a no buyaen ti video footage, mapaliiw a saan nga agang-angaw ni Duterte iti imbagana.
Saan met a maibaga dagiti adda iti aglawlaw ni Duterte nga agang-angaw laeng ti dati a presidente, nangruna no mabasa ti intero a transcript ti hearing a naangay nga awan ti laok nga emosion.
