Inyanunsiyon ni sigud a tennis world number one ken two-time Grand Slam winner Simona Halep ti panagretiro na ti sport a tennis.
Inaramid na daitoy a waragawag kalpasan ti pannakaabak na ti first round ti Transylvania Open kontra kenni Lucia Bronzetti ti Italy.
Kinuna ti 33-anyos a Romanian tennis star a saan nan a maibturan ti injury iti takyag ken tumeng na.
Naglaok met a liday ken ragsak ti narikna na agsipud ta kayat na pay ti agay-ayam ngem nu laeng kabaelan pay ti bagi na.
Nagyaman met isuna kadagiti fans ti tennis nga malaksid iti panagbalin na a world number 1 ket nangabak pay isuna iti Gran Slam.
Maipalagip a napaay ti tallo nga Grand Slam Finals ni Halep agingga nagun-od na ti umuna nga Major iti French Open idi tawen 2018 ken nagballigi pay ti Wimbledon iti simmaruno a tawen.
Idi Oktubre 2022 nasuspende isuna gapo iti panagpositibo ti roxadustat, maysa nga maipawil a droga a mangpapartak ti panagaramid ti red blood cells iti dara kabayatan ti labanna ti US Open.
Gapo iti insidente ket napaulogan isuna ti uppat a tawen a pannaka-ban ti tennis ngem kamaudianna ket nagbalin laeng nga siyam a bulan kalpasan a maaprubaran ti apela na.
