BR LA UNION – Inaprubaranen ti House of Representatives iti 3rd and final reading iti House Bill No. 8418, a mangted bileg kenni Presidente Ferdinand “Bongbong” Marcos Jr. tapno temporaryo a kissayan wenno suspindiren iti excise tax kadagiti produkto a petrolyo, iti tiyempo nga adda iti national wenno international crisis iti ekonomiya.
Nakagun-od ti nasao a gakat ti botos a 247-pabor, tallo-kontra ken awan ti abstention.
Segun kenni House Majority Leader Ferdinand Alexander “Sandro” Marcos, nairanta ti gakat a dagus a makatulong iti publiko nu adda ti nalabes a panagngato ti presyo ti langis iti sangalubongan a merkado, a mangigubway met ti panagngato iti pamasahe, presyo ti taraon ken kuryente.
Iti sidong ti gakat, mabalin nga ikkaten ti Presidente iti agingga P10 kada litro nga excise tax iti gasolina ken P6 iti diesel nu ti presyo ti krudo ket umabot wenno lumbes iti $80 kada bariles wenno adda naideklara a national emergency wenno kalamidad.
Iti suspensyon wenno panagkissay ti buwis ket mabalin nga agpaut agingga innem a bulan ken mabalin nga usaren ti Presidente ti nasao a bileg agingga Disyembre 31, 2028.
Dagiti nagbotos a saan a pabor iti gakat ket isuda: Kabataan PL Rep. Renee Co, Gabriela PL Rep. Sara Elago, ken ACT Teachers PL Antonio Tinio.
