Nagidonar ti South Korea iti 4,000 a metriko tonelada a bigas para kadagiti pamilia a dinuprak ti bagyong Kristine idi Oktubre 2024.
Katupag daytoy ti 100,000 a sako ti bagas nga agdagsen iti 40 a kilo tunggal maysa ken naipatulod ditoy pagilian iti dua a batch manipud South Korea idi Disiembre ken idi Enero, segun iti embahada ti Korea idiay Manila.
Ti donasion ti bigas ti Sokor ket paset ti ASEAN Plus Three Emergency Rice Reserve’s Tier 3 program.
Kabayatanna, idi Lunes ket indauluan ni Department of Agriculture (DA) Secretary Francisco Laurel Junior ti pannakaiwaras ti 100,000 a sako a donasion Sokor para kadagiti naapektaran iti napalabas a bagyo ditoy Region 1 agingga sadiay Region 5.
Segun iti sekretario, ti food donation ti Sokor ket napateg a suporta para kadagiti panagregget a naaramid iti panagimbag ken rehabilitasion ti pagilian kalpasan ti didigra, nu sadino ket maysa iti probinsia ti Batangas iti kadadaksan a naapektaran ti Bagyong Kristine.
