Napaay dagiti polis ti South Korea iti panangpadasda a mangarestar kenni South Korean President Yoon Suk-yeol iti presidential residence idiay Seoul idi kalman, Biernes, Enero 3, 2025.
Daytoy ket kalpasan ti panagsusupiat ti arrest team ken ti presidential security team ni Yoon a nagpaut iti dandani 6 nga oras.
Nagtitipon met dagiti sumupsuporta kenni Yoon iti asideg ti presidential residence tapno malapdan ti pannakaarestarna.
Segun iti Corruption Investigation Office (CIO) a mangidadaulo iti joint investigation kontra ken ni Yoon, saanda a naiserbi ti arrest warrant kalpasan nga hinarang ida ti 200 a soldado ken presidential security personnel, maibasar iti report manipud iti Yonhap news agency.
Nasurok a 10 a bus ken passenger cars ti nanglapped iti dalan nga agturong iti pagtaengan ti presidente, isu nga imposible a makastrekda iti pasdek.
Gapu iti daytoy, segun iti maysa nga imbestigador ti Corruption Investigation Office, inkeddengda a suspenderen ti pannakaiserbi ti arrest warrant kenni Yoon gapu iti safety concerns.
Kabayatanna, kalpasan ti standoff, naipadamag a ti hepe ti presidential security service a ni Park Jong-joon ket naidarum gapu iti obstruction of justice.
Segun iti polis ti SoKor, saanda a naiserbi ti arrest warrant kontra kenni Yoon gapu iti illegal obstruction ti security service.
Maipalagip nga immuna nga naimpeach ni Yoon babaen ti parlamento idi Disiembre 14, 2024 gapu iti alegasion nga insurrection ken iti ababa ken napaay a martial law-na idi Disiembre 3;
Ngem isu ket nasuspende laeng iti trabahona bayat a maur-uray ti pangngeddeng ti Korte ti Konstitusion nga isu ti mangikeddeng no maan-anayen a mapatakyas ni Yoon.
Gapu iti daytoy, ni Yoon ket Presidente pay laeng ti South Korea a kayatna a sawen nga adda pay laeng proteksionna manipud iti presidential security.
Kabayatanna, segun kadagiti imbestigador, mabalin a mabayag ti panagadal ken panangikeddeng iti sumaruno nga addang kalpasan ti napaay a pannakaarestar kenni Yoon.
Nupay kasta, kunada a posible nga agkiddawda iti sabali nga arrest warrant sakbay nga agpatingga ti napalabas a warrant inton Lunes.
No kasapulan, adda pagpilian dagiti imbestigador a dumawat iti pannakapaatiddog wenno mangipaulog manen iti arrest warrant.
