Nasurok a doble ti inaldaw a subsistence allowance dagiti kameng ti Armed Forces of the Philippines (AFP) babaen iti 2025 national budget.
Daytoy ti inwaragawag ni House Speaker Martin Romualdez idi simmarungkar kadagiti soldado iti Naval Operating Base sadiay Subic, Zambales.
Iti panagbitla ni Speaker Romualdez, imbagana kadagiti soldado a nangilatang ti House of Representatives iti P15 billion package a nasurok a doble ti P150 subsistence allowance-da iti P350.00.
Inyunay-unay ni Romualdez a maikari ti subsistence allowance dagiti soldado nangruna ta saan a mabalin a diskuento ti serbisioda iti umili.
Segun iti Speaker, ti nasao nga addang a mangpaadu iti subsistence allowance dagiti soldado ket natibker a panagkumit ti Kamara a mangipasigurado ken mangsalaknib iti pagsayaatan da.
Innayon ti lider ti Kamara nga obligasion ti gobierno a siguraduen nga umdas ti kabaelan ti militar a mangidepensa iti pagilian.
Para kenkuana ket napateg ti pagsayaatan dagiti soldado, gapu ta isuda ti kapatgan a paset ti depensa.
Kabayatanna, pinatalgedan manen ni Speaker Romualdez ti suportana iti AFP, nangruna iti panangipaayna iti umdas a pondo a tumulong iti modernisasion a programa ken mangipatungpal iti mandatoda a mangsalaknib iti kinasoberano ken mangidepensa iti teritorio.
Nagyaman met ti Speaker kadagiti personnel ti Philippine Navy a “vanguards” ti Philippine Maritime Security.
