BR LA UNION – Natay iti maysa a suldado kalpasan a pinaltuganna ti bagi na usar ti bukod na a service firearm, bayat a natay met ti asawa na kalpasan a binagsol ti katuganganna a lalaki idiay Purok Tilapia, Barangay 3, Bacolod City idi Domingo, Hulyo 12.
Dagiti biktima ket nabigbig nga isuda Erwin Pendon, 31-anyos ken aktibo a miyembro ti 11th Infantry Battalion ti Philippine Army, ken ti asawa na a ni Leonora Pendon, 26-anyos.
Segun kenni Police Lieutenant Conan Gadayan, Station Commander ti Bacolod Police Station 2, dua a nagsina nga insidente iti napasamak.
Sakbay ti pammaltog, timpuar ti nabara a sinnungbat dagiti agassawa.
Maibasar iti imbestigasyon, innala ni Erwin ti Glock 17 pistol na, imputok na nga immuna iti pader, sakbay a pinaltugan ti bagi na.
Nakita ti ama ti suldado a ni Edwin Pendon, 52-anyos, iti pasamak a nanggapwan ti panangbagsol na iti asawa ti anak na a ni Leonora.
Awan ti tama ti bala iti babae.
Agpada a naiturong iti ospital ti agassawa ngem natay dagitoy.
Narekober dagiti imbestigador iti service firearm ti suldado iti crime scene.
Iti agdama, nakadetine ni Edwin idiay Bacolod Police Station 2 ken sumangsango iti kaso a homicide.
