BR LA UNION – Ituloy ti Philippine Army ken dagiti kaalyado a pagilian ti naituding a joint military exercises iti laksid dagiti karit iti suplay ti lana, kinuna ti maysa nga opisyal ita nga aldaw ti Miyerkoles, Abril 1, 2026.
Mapattapatta nga 8,000 a suldado manipud Pilipinas, Estados Unidos, Japan, Australia, ken New Zealand ti makipaset iti “Salaknib” exercises a maisayangkat iti Northern ken Central Luzon mangrugi inton Abril 6.
Segun kenni Army spokesperson Col. Louie Dema-ala, nakaplano amin nga aktibidad ken ‘awan ti maipatungpal a budget cuts iti laksid dagiti isyu ti suplay ti lana.
Ti Salaknib exercises ket mangipamaysa iti maritime ken territorial defense, humanitarian assistance ken disaster response, kasta met ti amphibious ken combined arms operations.
Ita a tawen, umuna a gundaway a makipaset ti Japan ken New Zealand iti nasao a military drills.
Innayon ni Dema-ala nga adda maisayangkat a live-fire exercises, nupay saan pay a masinunuo no anya nga alikamen ti mausar agsipudta maibasar daytoy iti senaryo ti panagsanay.
Tarigagay ti aktibidad a papigsaen ti kabaelan dagiti suldado babaen ti panagsanay kadwa dagiti international partners ken panangusar iti nadumaduma a military capabilities.
