BR LA UNION – Mailung-lungalong ita ti panangiraman iti maaw-awagan a “super wet ken super dry season” iti climate cycle a nasken a mabantayan ditoy pagilian.
Segun kenni Climate Change Commission (CCC) Senior Commissioner Albert dela Cruz, saan laengen a panawen ti tikag ken panagtutudo ti agraraira ditoy pagilian, a naobserbaran iti sumagmamano a naglabas a tawen.
Kinuna ti opisyal a malaksid iti “dry” and “wet” season, rumbeng pay nga ikonsidera iti “super dry” ken “super wet” season para iti panangbukel dagiti polisiya nga adda dakkel nga impact na iti panangsungbat ti problema iti panawen.
Kinuna ti komisyon a maki-koordinar da iti Philippine Atmospheric, Geophysical and Astronomical Services Administration seknan ti daytoy, agraman ti dadduma pay a sanga ti gobyerno.
Nu ti sigud ket gagangay a layos laeng nu agtudo, adda itan dagiti gundaway iti maysa a bulan a malayos ti sumagmamano a paset ti pagilian.
Bayat a nu tiyempo ti tikag, na-obserbaran a nalabes ti kinadaga-ang ken panag-maga ti daga iti napapaut itan nga aldaw.
