Inwaragawag ti Bureau of Customs (BOC) Commisioner a ni Ariel Nepomuceno nga adda pay ti agingga dua a bulan a supply ti langis ken dadduma pay a produkto a petrolyo ditoy Pilipinas, manipud Department of Energy (DOE).
Daitoy ket mainaig paylaeng ti agraraira a gubat idiay Middle East a kangrunaan a pagtataudan ti langis ti intero a lubong.
Kinuna ni Nepomuceno a nakatuding da a tingitingen dagiti warehouses ti kompanya ti langis tapno masiguro nga awan ti artificial shortage wenno agim-imbento a bassit a talaga ti supply da.
Sakbayna ket immun-unan a kinuna ti DOE nga agbalin da nga strikto iti panagbantay kadagiti fuel hoarders ken uray ti saan a nainkalintegan a panagpangato ti presyo wenno profiteering.
Innayon pay ni Nepomuceno a makaapekto pay ti gyera idiay Middle East kadagiti tax collections ti pagilian manipud kadagiti produkto a petrolyo. Pagaammo a dumanon ti saan a bumaba ti P330B agingga P410B ti biruk ti Pilipinas manipud kadagiti buis ti langis.
Agtultuloy met ti panagsagana ti ahensya kasta met dagiti dadduma pay a kameng ti gobierno para kadagiti contingency plans tapno makissayan ti nakaro nga epekto ti gyera iti supply ti krudo kasta met ti panaggaraw ti presyo daitoy.
