Dinutokan ni Presidente Ferdinand Marcos Jr. ni Supreme Court Associate Justice Rodil V. Zalameda kas sumaruno a Chief Justice ti Korte Suprema.
Impakaammo ni Presidential Communications Office (PCO) Secretary Lino Cayetano ti pannakadutokna ita a Huebes, a ni Zalameda ti mangsukat kenni Chief Justice Alexander Gesmundo a naituding nga agretiro inton Nobiembre 6.
Impaganetget ni Cayetano nga addaan ni Zalameda ti nasurok a tallo a dekada a natan-ok a serbisio iti sistema ti hustisia, manipud iti panagbalinna nga opisial ti korte ken piskal ti publiko agingga iti Court of Appeals ken Supreme Court.
Segun iti PCO, binigbig ti Presidente ti kinapateg ti kapadasan ken naprinsipio a liderato tapno mataginayon ti panagtalek ti publiko iti hudikatura.
Impeksa pay ni Presidente Marcos ti naan-anay a panagtalekna nga aramiden ni Zalameda ti baro nga akemna nga addaan ti integridad, di panangidumduma, ken natibker a panagkumitna iti turay ti linteg.
Kagiddan daitoy, nangipaay met ti Palasio iti kablaaw kenni Zalameda iti baro a responsibilidadna ken napasnek a panagyaman kenni Gesmundo iti dedikado a panagserbina iti pagilian.
