BR LA UNION – Inarestar dagiti otoridad ti maysa a 23-anyos a lalaki gaputi maipagarop a panagtakaw ti motorsiklo idinto a naglibas ti maysa pay a suspek usar ti tinakaw a motorsiklo.
Napasamak ti insidente iti igid ti national highway idiay Barangay Bungol, Balaoan, La Union, idi Hulyo 14, 2026.
Iti natiliw a suspek ket residente ti Mapandan, Pangasinan idinto a ti naglibas ket tubo ti San Carlos City, Pangasinan.
Maibasar iti report manipud Balaoan Police Station, ti natakaw a motorsiklo ket kukua ti managan Lorenz Coloma, 23-anyos, maysa a construction worker, residente ti Bungol, Balaoan, La Union.
Iti inisyal nga imbestigasyon dagiti otoridad, nakita mismo ti 52-anyos a Barangay Tanod a ni Rodrigo Ocassion ti panangitaray dagiti suspek ti motorsiklo nga agmaris ti maroon, addaan ti plaka 424 IFL, a nakaparada iti asideg ti Bungol National High School.
Idi immasideg ti barangay tanod kadagiti suspek, dagus a naglibas ti maysa a naglugan iti tinakaw a motorsiklo ken nagturong iti abagatan a direksiyon iti national highway.
Kabayatanna, iti natiliw a suspek ket nai-turnover iti Balaoan Police Station para iti umno a disposisyon.
