Agkidkiddaw dagiti Taliban iti tulong manipud kadagiti nadumaduma a pagilian kalpasan ti napasamak a gingined idiay Afghanistan a nakatayan dagiti ginasut nga indibidual ken nakadadaelan dagiti purok.
Sumangsango ita iti pagilian ti kinakurang ti taraon ken iti epekto ti panakapasardeng ti foreign aid.
Segun iti update manipud kenni Taliban government spokesperson Hamdullah Fitrat, agarop 2,205 dagiti pimmusay, 3,640 dagiti nadangran, ken 5,400 dagiti nadadael a pagtaengan.
Marigatan dagiti relief teams a makadanon kadagiti nasulinek ken kabanbantayan a lugar gapo kadagiti mapaspasaran a panagtudo, landslides, ken nadadael a kalsada.
Kabayatanna, nakissayan iti relief efforts iti nasao a pagilian gapo iti panakapasardeng ti US aid isu a nagregget iti pagilian tapno malabanan iti bumababbaba a global aid sipud iti panagturay ti Taliban idi 2021 – a nangipakat met kadagiti naulpit a panagannurutan ken panangdusa kadagiti 43 a million nga umili ti nasion.###
