BR LA UNION – Naipasidong iti kustodiya dagiti otoridad ni sigud nga Anakalusugan Party-list Rep. Michael “Mike” Defensor ken negosyante a ni Joseph Varias Espiritu idi kalman, Hulyo 6, kalpasan a nangipaulog ti Sandiganbayan Third Division iti arrest warrant mainaig iti plunder case a sangsangwenda mainaig iti maipagarop a P75-milion nga undeclared campaign contribution.
Iti press briefing, imbaga ni Interior Secretary Jonvic Remulla a naaresto dagiti dua iti uneg ti maysa a coffee shop idiay Quezon City ken dagus a naiturong idiay Sandiganbayan para iti return of warrant sakbay a naipasidong iti booking process iti opisina ti Philippine National Police – Criminal Investigation and Detection Group (PNP-CIDG).
Segun iti sekretaryo, kalpasan ti booking process ket maiturong dagiti dua iti detention facility idiay Payatas.
Maysa pay a co-accused iti kaso a plunder da Sen. Rodante Marcoleta, Mike Defensor ken Joseph Espiritu a ni Aristotle Viray, ket naarestar metten ti PNP, segun kenni PNP spokesperson PCol. Allen Rae Co.
Nupay kasta, impaganetget ni Defensor iti maysa a Facebook post a saanda a naaresto ngem ketdi boluntaryo a simmukoda kadagiti otoridad.
Immuna a nangipaulog ti Sandiganbayan iti arrest warrant kontra kada Senador Rodante Marcoleta, Defensor, Espiritu, ken Aristotle Baluyut Viray mainaig iti kaso a plunder.
Adda pakainaiganna ti kaso dagitoy iti maipagarfop a saan a naideklara a campaign contribution nga agbalor ti P75 millon para iti kandidatura ni Marcoleta iti kina-senador idi 2025 election.
Maibasar kadagiti dokumento ti kaso, ti nasao a donasyon ket maipagarop a naggapo kada Defensor, Espiritu ken Viray.
Immuna a simmuko ni Marcoleta kadagiti otoridad kalpasan a nangipaulog ti warrant of arrest iti Sandiganbayan.
