LA UNION – Iti umuna a gundaway iti uneg ti innem a dekada, ita laeng a nakaipatulod ti Pilipinas iti tallo a babbai a gymnast a makipaset iti prestihiyoso nga Olimpiyada.
Ngem nasapa a nalpas ti kampanya iti Paris Games da Aleah Finnegan, Emma Malabuyo, ken Levi Jung-Ruivivar, iti women’s artistic gymnastics all-around qualification idiay Bercy Arena, idi Domingo (Hulyo 28) idiay Paris wenno Lunes, Hulyo 29, ditoy Pilipinas.
Da Jung-Ruivivar ken Malabuyo ket nakaurnong ti 51.099 points iti all-around, bayat a ni Finnegan ket naka-50.498 points.
Ngem saan nga immanay ti nagun-od da a puntos iti cutoff tapno maka-abante da koma iti event finals.
Dagiti laeng top 24 iti all-around ken top eight iti tunggal apparatus nga addaan ti maximum a dua a gymnast ti tunggal pagilian iti makaabante iti medal round.
Immuna ti daytoy, ni Gymnast Carlos Yulo iti ikaunaan a naipaayan ti gundaway a makagun-od ti medalya kalpasan nga immabante iti finals of 3 events iti Paris Olympics.
Simrek ni Yulo iti all-around, floor exercise, ken vault finals ken isuna ti namnamaen ti Pilipinas a makagun-od ti umuna nga Olympic gymnastics medal.
Lumaban ni Yulo para iti podium finish iti all-around inton Miyerkoles, Hulyo 31, bayat a ti floor exercise ken vault ket inton Agosto 3 ken 4, 2024.
