Nangbuangay ti Police Regional Office 1 nga idaulwan ni PBGeneral John C. Chua, iti Task Group SONA 2023 tapno papigsaen ti panangipatungpal ti seguridad iti rehiyon para iti maikadwa nga State of the Nations Address (SONA) 2023 ni Pres. Ferdinand Romualdez Marcos, Jr. inton Lunes (Hulyo 24).
Iti PRO 1, kagiddan ti misyon ken pagrebbengan na ket rumbeng a papigsaen na dagiti operasyon a mangted ti kinatalged ken seguridad ti publiko, ipatungpal ti linteg ken dadduma pay nga aktibidad tapno masiguro ti naurnos ken nakapya a panangiganwat ti maikadwa a SONA ni Pres. Marcos, Jr.
Mangimuntar dagiti otoridad ti checkpoint iti intero nga Ilocos Region, iti pannakibinnulig ti Land Transportation Office Regional Office 1.
Kabayatanna, adda ti pakabuklan a 200 Civil Disturbance Management contingents ti naka-standby para iti posible a deployment idiay National Capital Region.
