LA UNION – Nakasagana a tumakder kas testigo ti nakakita iti napasamak nga pammaltog iti maysa nga online shopping courier iti Gov. Joaquin Ortega Ave., idiay Barangay Madayegdeg syudad ti San Fernando, La Union idi kalman.
Iti pannakiuman ti Bombo Radyo La Union kenni alyas Norman kinuna na a sakbay a mapasamak ti pammaltog ket immuna a nagsaludsod kenkuana ti biktima a ni Benn McClaude Madayag, 35, residente iti ili ti Bauang, para iti ideliver na nga item kenni Dianne Salanga a nag-order iti sapatos.
Kalpasan iti transaksyon dagiti dua ket rimmuar ti biktima ken kabayatan a nakatakder daytoy iti batog ti motorsiklo na ket dito a sinardengen dagiti suspek nga armado iti paltog.
Nakiinnagaw pay ti biktima kadagiti suspek ngem pinaltoganda latta daytoy iti namindua a daras nga isu iti nakatumbaan na.
Iti met pannakiuman ti Bombo Radyo La Union kenni Ariel Flora, maysa kadagiti timmulong tapno maitaray iti Ilocos Training Regional and Medical Center (ITRMC), kinuna na amismo nga ti biktima iti nangi-dial ti cellphone daytoy tapno maawagan ti pamilya na.
Kabayatan na, agtultuloy pay ti imbestigasyon dagiti otoridad maipapan iti pakabigbiggan dagiti suspek.
