Impasiguro ti National Grid Corporation of the Philippines a nakabantay da kadagiti amin a transmission lines para ti posible nga epekto ti Bagyong Crising.
Kinuna ti ahensya nga iti agdama ket agtatalinaed paylaeng a normal ti kasasaad dagiti amin a transmission lines ditoy pagilian.
Inlawlawag ti NGCP a nakasagana da para ti panangkissay ti epekto nga inggubuay ti panagduprak ti bagyo, napapigsa pay gapo iti agraraira nga Southwest Monsoon wenno Habagat.
Sagsaganaan da iti natalged ken mapagtalkan a komunikasyon, umdas a supply ti piyesa a kasapulan para iti panangpirmis kadagiti madadael a pasilidad.
Karaman kadagitoy nga operasyon ket ti positioning ken deployment dagiti line crew, partikular kadagiti estratehiko a lugar. Babaen ti kastoy a wagas ket masiguro iti naparpartak a panagresponde dagiti personnel da kadagiti madadael ken agkasapulan ti panangpirmis a linya ti kuryente.
