BR LA UNION – Natay iti maysa a tricycle driver kalpasan a nadungpar ti pickup car iti man-manehuenna a traysikel.
Napasamak ti aksidente iti kawatiwatan ti national highway idiay Barangay Taboc, San Juan, La Union agarop alas 4:50 p.m. idi kalman, Mayo 6.
Segun kenni Police Major Lawrence Ganuelas, agdama a Public Information Officer ti La Union Police Provincial Office, dead on arrival ti tricycle driver idiay Bacnotan District Hospital idinto a ti pickup driver ket agtultuloy a maag-agasan iti ospital kalpasan a nagpasar ti pannakadun-dunor iti bagi.
Imbaga ni Ganuelas, maibasar iti CCTV footage, nga agpada nga agturong iti pa-amianan a direksiyon dagiti dua a behikulo idi maipagarop a na-lost control iti manibela ti pickup driver, rason ti pannakasagid na iti tricycle nga adda iti outer lane.
Gaputi kapigsa ti impact ti aksidente, maipagarop a naipurwak ti tricycle driver ken nagsagaba ti nakaru a pannakadun-dunor, puon ti nakatayan daytoy.
Nagpasar met ti nakaru a pannaka-perdi iti traysikel ken iti sangwanan a paset ti pickup car.
Mainaig ti nasao nga aksidente, nagpalagip ti Ganuelas kadagiti drivers ken motorista nga aginnayad iti panag-maneho nangruna ket dup-dupodopen ti tattao ti ili a San Juan ken ikonsidera payen iti weather condition, a sagpaminsan ket makapadas ti panagtudo nangruna iti malem iti tengnga ti napudot a panawen.
