Kinontra ni sigud a Senador Antonio Trillanes IV iti waragawag nga awan pay ti Senador a naarestar iti uneg ti Senado, kasaruno ti gandat a panangarestar kenni Senador Ronald “Bato” dela Rosa.
Iti maysa nga interview idiay Senado, imbaga ni Trillanes a naarestar isuna idi 2018 kabayatan ti sesyon ti Upper House. Impakitana met iti video ti panangiserbi ti arrest warrant ken panangibasa ti Miranda rights iti uneg ti Senado.
Naipasidong idi ni Trillanes iti protective custody ti Senado babaen kenni sigud a Senate President Vicente Sotto III mainaig iti kaso a rebellion kalpasan nga ibabawi ni sigud a Presidente Rodrigo Duterte iti amnestiyana, ken idi agangay ket nakapagpiyansa.
Idi 2024, nagdesision iti Korte Suprema a mailabsing iti linteg iti panang-withdraw ti amnestiya ni Duterte.
Malaksid kenni Trillanes, nadakamat met iti pannakaarestar idi ni ML party-list Rep. Leila de Lima iti uneg ti Senado mainaig dagiti kaso nga adda pakainaiganna iti ilegal a droga. Napaawan-basol met ni de Lima iti amin a kaso maikontra kenkuana.###
