Impadamag ni US President Donald Trump iti pannakabukel ti “board of peace” para ti Gaza, a panggepna nga imaton iti interim leadership ken reconstruction dagiti nadadael a lugar kalpasan ti gubat iti nagbaetan ti Israel ken Hamas.
Dagiti founding members ket buklen da US Secretary of State Marco Rubio ken sigud a Prime Minister ti UK a ni Sir Tony Blair. Karaman pay iti Executive Board ti Middle East envoy a ni Steve Witkoff, Jared Kushner, World Bank President Ajay Banga, Marc Rowan, ken ti US national security adviser a ni Robert Gabriel bayat a ni Trump iti agserbi a chairman ti lupon.
Nadutokan met iti sigud a UN Middle East a ni Nickolay kas pannakabagi ti Lupon idiay Gaza.
Ti nasao a lupon ket paset ti 20-point peace plan ni Trump.
Malaksid ditoy ket maporma ti international stabilization force nga idauluan ni US Major General Jasper Jeffers tapno suportaran iti seguridad ken sanayen ti Palestinian Police.
Kagiddan ti nadakamat nga addang ket maipasdek ti naisina a National Committee for the Administration of Gaza, maysa a15-member Palestinian technocratic body nga idauluan ni Ali Shaath ken mangiturong iti inaldaw nga operasion iti teritorio.
Maipalagip a naipatungpal ti US Peace Plan idi Oktubre napalabas a tawen ken adda itan iti maikadua a paset, a nakapamaysa iti pannakaibangon manen ken demilitarisasion ti Gaza, agraman ti pannakaikkat ti armas ti Hamas.
Nupay kasta, agtalinaed a nakapsot iti katulagan bayat nga agtultuloy iti mailislista a kinaranggas, ken segun ti United Nations, agtaltalinaed a nakaro iti kasasaad dagiti nasurok 2.1 million a Palestino idiay Gaza.###
