Inpakaammo ni President-elect Donald Trump nga ikkanna ti TikTok iti 90-day extension manipud iti pannaka-ban a nangrugi idi kalman, aldaw ti Domingo, Enero 19, 2025, maysa nga aldaw sakbay ti maika-47 nga inagurasionna ita a Lunes kas Presidente ti Estados Unidos.
Kinuna ni Trump a maitutop ti extension ken nalabit a mangaramid metlaeng isuna ti pormal nga anunsio apaman nga agsapatan ti opisinana.
Inulitna ti isu met laeng nga waragawag iti interview na iti local news ti masanguanan a desisionna mainaig iti nadakamat nga isyu.
Daytoy ket kalpasan ti pangngeddeng manipud iti Korte Suprema ti Estados Unidos a mangipariten iti TikTok malaksid no ti Chinese parent company na a ByteDance ket ilako ti plataporma, banag a pinagkedkedan ti nasao nga kompanya.
Kas sungbat, namakdaar ti TikTok a mabalin a saan ton a mausar ti siasinoman idiay America ti platform da no saan nga ited ti administrasion ni Biden dagiti pammatalged kadagiti service provider a dida ipatungpal ti pannakaiparit ti pannakausar daytoy para kadagiti Americano.
Inawagan ni White House spokeswoman Karine Jean-Pierre ti pakdaar ti TikTok kas maysa nga “stunt” ken kinunana a ti pannakaipatungpal ti linteg ti responsabilidad ti sumsumrek nga administrasion ni Donald Trump.
Napaliiwna pay a nalawag nga impakaammo ti administrasion ni Biden ti tignay da ken aniaman a pakaseknan ket masapul a tamingen ti sumaruno ken baro nga administrasion.
