Impadamag ni US President Donald Trump a tarigagay na a permanente nga isardeng iti migration idiay Estados Unidos manipud kadagiti napapanglaw a pagilian.
Daytoy ket kasaruno ti shooting incident dagiti dua a miembro ti National Guard idiay Washington, D.C. ken nabigbig iti umuna a suspek kas maysa nga Afghan national.
Iti online platform ti U.S. President, kenunana nga aramiden na daytoy tapno maikkan-dalan iti naan-anay a panagrekobre iti pagilianda ken mapapanaw dagiti maipagarop nga illegal admissions ti naglabas a Biden administration.
Innayon na pay a mapapanaw dagiti siasinoman a saan a “net asset’ ti America wenno dagiti saan a makabael nga ayaten iti pagilian.
Immunan a pinabasol ni Trump dagiti immigrant kadagiti problema iti krimen aginggana iti kinakurang ti pabalay kas paset ti social dysfunction iti America ken iti panangdemand ti reverse migration wenno panangpaawid kadagiti migrants kadagiti nagtaudan da a lugar.#
