BR LA UNION – Siniguro ti baro a buangay a Truth Commission nga agbalin nga independent daytoy iti isayangkat na nga imbestigasyon kadagiti pammapatay idi panawen ni sigud a Presidente Rodrigo Duterte ken dadduma pay nga administrasyon nga adda napasamak a human rights violations.
Daytoy ket uray ingkari ni Philippine National Police (PNP) chief, PBGen. Melencio Nartatez Jr. iti serye ti panangamiris ti komisyon.
Iti interview ti Bombo Radyo kenni Truth Commission Commissioner for Public Documentation, Transparency, and Democratic Accountability Carlos Conde, tinakderan na nga agtalinaed iti kina-independent ti komisyon nga adalen ken amirisen dagiti napasamak a human rights violations tapno makabukel iti komisyon ti independent report.
Napateg kunana ti nasao a report tapno masuportaran iti tarigagay ti grupo nga agbalin a palagip daytoy iti nadara a drug war a nakaigapwan ti pannakatay iti nasurok 30,000 nga indibiduwal, maibasar iti independent report ti human rights watchdog.
Nagyaman ni Conde iti tarigagay ti pulisya a makitinnulong ken siniguro na nga amin a mangibagbaga ti interest nga agistorya ken agilanad ket maipaayan ti gundaway a mangngegan.
Addan ti inisyal a listaan ti Truth Commission para kadagiti target a makasarita a survivor ken pamilya dagiti biktima.
Nupay adda dagiti pulis a nangipeksa ti interes nga agistorya ti kapadasan, imbaga ni Conde a saan da pay a karaman iti initial list bayat nga agtultuloy ti validation kadakuada.
Nabukel ti komisyon idi napan a lawas, a maysa nga independent, non-government, ken truth-seeking body.
Idaulwan daytoy ni sigud nga International Criminal Court Judge Raul Pangalangan.
