Agtultuloy iti panagleddaang idiay Iran kalpasan ti pannakapapatay ti sigud a Supreme Leader a ni Ayatollah Ali Khamenei.
Manamnama nga agdupodop dagiti tattao ita nga aldaw para iti kangrunaan a prosesion ti pumpon ni Khamenei idiay Tehran. Paset daytoy ti sumagmamano nga aldaw nga state funeral nga agpatingga iti pannakaitabonna iti siudad ti Mashhad, kalpasan a naiturong ti bangkayna kadagiti dadduma pay a napateg a siudad idiay Iran ken Iraq.
Maipalagip a ti anak ken naituding a kasukatna a ni Ayatollah Mojtaba Khamenei, ket saan pay laeng a nagparang iti publiko. Segun kadagiti report, agtaltalinaed a saan a makitkita ti publiko gapu iti maipagarop nga isyu ti salun-at ken nakaro a pangta iti seguridad kalpasan a nasugatan met iti panagatake a nakatayan ti amana.
Kabayatanna, nagbalin met a sentro iti seremonia dagiti panawagan ti panagibales iti Estados Unidos ken Israel. Maysa a mannaniw ti nangbasa iti daniw a nainget a mangbabalaw ken ni US President Donald Trump, bayat nga impukkaw dagiti rinibu a tagasuporta dagiti panawagan nga agibales iti maipagarup a pannakapapatay ti sigud a lider ti Iran.
Nupay kasta, saan nga amin nga umili ti Iran ket nakipamaysa iti nasao a sentimiento. Segun iti sumagmamano nga interbiu ti internasional a media kadagiti umili ti Tehran, kinuna ti dadduma nga awan ti interesda kadagiti seremonia ken ad-adda a maseknan dagitoy iti agtultuloy a krisis iti ekonomia, nangato nga implasion, ken epekto ti nabayagen a tension iti rehion.
Iti sabali a bangir, agtaltalinaed a normal iti panagayus dagiti barko iti Strait of Hormuz – maysa kadagiti kapatgan a ruta a lumasat iti dandani kakalima ti sangalubongan a suplay ti lana.
Nupay kasta, agtultuloy iti nainget a panagbantay dagiti autoridad gapu iti panagbuteng a mabalin a maapektaran ti sangalubongan a panagtagilako no kumaro iti tension idiay Middle East.
Manamnama met a pagsasaritaan dagiti pagilian a kameng ti NATO iti seguridad ti nasao nga estratehiko a dalysatan iti mapaspasungadan a summit.
Kabayatanna, nakatuding nga agkita da Israeli Prime Minister Benjamin Netanyahu ken US President Donald Trump idiay Washington inton sumaruno a lawas tapno pagsaritaanda ti kasasaad ti Iran, seguridad idiay Middle East, ken dadduma pay a rehional nga isyu.
Iti maysa nga interbiu, inpaganetget ni Netanyahu nga agtalinaed a napigsa iti relasion ti Israel ken Estados Unidos iti laksid ti espekulasion maipapan iti nagduduma a panangmatmatda iti isyu ti Iran.
Agtultuloy a nakapamaysa iti intero a lubong iti sumaruno nga addang ti baro a panangidaulo ti Iran, bayat nga agtalinaed a nangato ti tension iti rehion ken umun-uneg iti panagbuteng maipapan iti posible a kumaro pay ti panagsusupiat idiay Middle East.###
