BR LA UNION – Nagbalin a naannayas ken ballaygi iti umuna nga aldaw a pannakaipatungpal ti comelec checkpoint ken gun ban idiay ili ti Bauang, La Union babaen ti inspection team a buklen ti pito a miyembro ti Bauang Police Station nga indaulwan ni Police Major (PMAJ) Dominador P. Apostol II, deputy chief-of-police ti Bauang Police Station ken Comelec nga indaulwan ni Election Officer Gregorio Cabanban Jr.
Iti interview ti Bombo Radyo La Union kenni Mr. Gregorio Cabanban Jr. ti Bauang Comelec Office, kinuna na nga awan ti nakita da a panaglabsing iti linteg wenno omnibus election code partikular dagiti nagimet ti paltog, kadagiti motorista a naipasidong iti inspection idi kalman, partikular iti kawatiwatan ti Baguio–Bauang Road.
Kinuna na nga adda driver a nakita da a nagimet ti patadem, ngem saan da a kinumpiska daytoy, agsipudta nakailanad iti desisyon ti Korte Suprema a saanen a karaman dagiti bladed weapons a makumpiskar, malaksid kadagiti paltog, lisensiyado man wenno saan.
Imbatad ni Cabanban, a segun iti nasao a driver, iti tugot na patadem ket us-usaren da a pagkaliskis ti ilaklako da a sida iti palengke.
Imbaga na pay a tallo a checkpoint iti isayangkat da ti maysa nga aldaw iti nasao nga ili .
Iti siasinuman kunana nga aglabsing iti election gun ban ket sumango ti maiyannatop a pannusa, iti sidong ti Omnibus Election Code.
Iti pakabuklan, aganay 20 checkpoints iti na-establisar iti naduma-duma a paset ti probinsiya ti La Union.
Iti nationwide gun ban a nangrugi idi kalman, Enero 12, ken agleppas inton Hunyo 11, ket tapno masiguro iti kinatalged dagiti umili ken maliklikan dagiti election-related incidents iti midterm election inton Mayo 12, agdama a tawen.
