Inlawlawag ti Malacañang iti basaran ti panangpadayaw ti unmodified opinion ti Commission on Audit kadagiti ahensya.
Daitoy ket kalpasan a makaawat ti “unmodified opinion” rating ti Office of the Vice President (OVP) manipud COA para ti nagsasaruno a tallo a tawen.
Segun kenni Palace Press Officer Claire Castro, maipadpadayaw ti unmodified opinion rating kadagiti ahensya a nakasurok ti intuding a framework ti financial reporting.
Kabayatanna, saan met a sakopen ti rating ti naisina a compliance ken performance audit a maar-aramid tapno maamwan nu maus-usar nga umiso ti pondo ti ahensya.
Innayon pay ni Castro nga usto ti waragawag ti COA ngem saan a kayat na a satwen nga awanen ti natakuatan a “misstatement” wenno misdeclaration iti naisubmitir nga audit report ti OVP para ti panaggastar ti pondo na idi tawen 2024.
Impunto na dagiti desisyon ti COA para ti OVP kadagiti napalabas a tawen kas iti notice of disallowances para ti confidential funds idi tawen 2022 a P73M ken P164M met idi tawen 2023.
