LA UNION – Blanko pay laeng dagiti otoridad iti motibo ti inaramid a pannakapapatay ti tallo nga indibidual kabayatan nga adda dagitoy iti uneg ti Shania Kenny Merchandise idiay Barangay Catbangen syudad ti San Fernando, La Union idi rabii.
Maipalagip, dua nga lallaki ti simrek iti nasao a pasdek kasaruno iti panangpaltog ken panangpatay kadagiti biktima nga isuda Ferdinand Gacayan, security guard; Haide delos Reyes, accountant; ken Kareena Mirchandani, manager ti establishimento.
Am-amuen pay dagiti maseknan no adda pakainaegan na ti nasao a pammaltog idi tawen 2016 no sadino pinaltogan dagiti saan pay nga ammo a suspek ti negosyante a ni Lal Mirchandani, residente ti Brgy. Catbangen, agtagikua ti SKM computer shop, ken asawa iti maysa kadagiti biktima a ni Kareena.
Agtultuloy met ti koordinasyon ti San Fernando City Police kadagiti kaasideg nga establishimento no sadino a napasamak ti krimen tapno masukimat dagiti CCTV camera a nakamuntar ditoy ken maamuan iti pakabigbiggan dagiti suspek ti krimen.
Kabayatan na, inikkat metten dagiti otoridad ti anggulo nga holdap iti napasamak no sadino awan ti napukaw iti kaha ti establishimento idi a napasamak ti pammaltog.
