LA UNION – Nangipeksa iti sakit ti nakem dagiti nagannak ti nagpakamatay a 16-anyos a high school student kontra iti teacher daytoy idiay ili ti Agoo, La Union.
Iti pannakiuman ti Bombo Radyo iti agassawa a Rogelio ken Marissa Dulce, kinunada a saanda a maawat iti inaramid ti maestra iti anakda a ni Rosean a pabainan daytoy iti pagadalan.
Iti istorya ni Misis Dulce, maipagarup a nakaawat daytoy iti awag ti cellphone manipud ti eskwelaan a mangibagbaga a naawanan iti puot ti anakda kalpasan a pagungtan daytoy iti teacher.
Idi a mapukawan iti puot ken napaidda ti estudyante kalpasan a pagungtan iti maestra ket maipagarup a binaybay-anna daytoy, ken sabali pay a teacher iti nangarayat tapno iturong daytoy idiay klinika.
Sigun pay iti misis, kanayon a mapukawan iti puot ti anakda no maungtan daytoy wenno makarikna iti nakaro a sakit iti nakem.
Saanda met unay a pagpagungtan ti anakda gapu iti kasasaad daytoy.
Kinuna met ni Mister Dulce, a kayatda a kasarita iti maestra ti anakda tapno pagpalawagen daytoy.
Kabayatanna, mabasa iti conversation ti messanger iti baetan ti biktima ken ti gayyemna iti panangipeksa daytoy ti sakit iti nakem nga inaramid ti teacher.
Sigun iti biktima, maipagarup a nakaro iti pannakibiang ti teacher kenkuana ken balbaliktadenna ti napasamak nga agkunkuna a natangken iti ulo daytoy ken isuna ti addaan ti basol.
Nakunana pay a napukawan daytoy iti puot ken natinnag iti agdan kalpasan a mapagungtan gapu ta saanna a nabaelan iti panagsangit.
Gapu iti daytoy ket sinukon isuna iti inana iti eskwelaan.
Iti naudi a mensahe ket kinuna iti estudyante nga ammo ti Dios iti pudno a napasamak ken ipabus-oyna amin daytoy iti Dios.
Ur-urayen pay laeng iti Bombo Radyo ti palawag ti nasao a teacher ken ti mangimatmaton iti pagadalan a serserrekan iti biktima maipapan ti insidente.
Immuna iti daytoy, nasarakan laengen iti nagannakna ti estudyante a nakabitin iti bagi daytoy babaen ti panagaramat iti tali a naigalot iti tengnged ken bubungan iti kwartona. (Abs Flores)
