BR LA UNION – Umaboten iti 15 ti natay, 40 dagiti missing, ken nasurok 300 a pasaheros ti na-rescue kalpasan a limned ti nagluganan da a passenger ferry nga M/V Trisha Kerstin 3 idiay parte na ti Pilas Island, Basilan agarop alas 2:00 itay parbangon, Enero 26, 2026.
Naggapo ti nasao a ferry idiay Zamboanga City ken agturong koma idiay Isla ti Jolo idi napasamak ti trahedya.
Agtultuloy ti Search and Rescue (SAR) dagiti otoridad kadagiti mapukpukaw.
Saan pay a madetermina dagiti otoridad ti pudno a makagapo iti limned a ferry.
Ti M/V Trisha Kerstin 3, ket maysa nga inter-island cargo ken passenger ferry, nga aglay-layag manipud Zamboanga agingga Southern Jolo island idiay probinsiya ti Sulu, addaan ti 332 a pasaheros ken 27 a crew members idi napasamak ti pannakalned daytoy gaputa maipagarop a nakapadas ti technical problems itay parbangon, segun kadagiti coast guard officials.
Segun kenni Philippine Coast Guard Commander Romel Dua, limned ti ferry bayat a nasayaat ti panawen, manipud iti kaadayu a one nautical mile wenno dandani dua a kilometro manipud iti kaasetgan a barangay a Baluk-baluk idiay Basilan province.
