LA UNION – Nawaya-wayaanen dagiti 8 manipud kadagiti 13 nga agtutubo, nga inarestar ti PDEA idi Oktubre 28, agdama a tawen kalpasan a naaktuan dagitoy nga agpa-pot session iti igid ti baybay idiay Barangay Urbiztondo, San Juan, La Union.
Maipalagip a napasamak ti insidente iti kangitingitan ti selebrasyon ti Surfing break 2017.
Kinuna iti Bombo Radyo La Union ni PDEA Region One Spokesperson Bismarck Bengwayan, uppat iti nagpiyansa bayat a dagiti uppat pay ket nag-negatibo iti naisayangkat a drug test.
Dagiti met nabatbati nga agtutubo ket agtaltalinaed iti custodiya ti Philippine Drug Enforcement Agency (PDEA) Regional Office One, ngem posible a mapalubosan met laeng dagitoy gaputa bailable iti naidatag a kaso kontra kadakuada.
Kabayatanna, nagyaman ni Bengwayan kadagiti barangay officials ti nasao a lugar a naki-koordinar iti PDEA, para iti pannaka-arestar dagiti nasao nga indibidual.
Maipalagip pay a nakakumpiskar dagiti otoridad iti sumagmamano a supot a naglaun ti maipagarop a marijuan ken drug paraphernalia.
