Faulty wiring iti nakaigapwan ti timpuar nga uram idiay Barangay Rimos #3, Luna, La Union idi lunes, Agosto 21, 2023.
Daytoy ti resulta ti imbestigasyon nga inwayat ti Bureau of Fire Protection ti nasao nga ili.
Iti pannakiuman ti Bombo Radyo La Union kenni FO2 Havy Glen Gaetos ti Luna Fire Station, kinunana a nagdisso ti apoy a gapwanan ti faulty wiring iti lupot ken kurtina, isunga napartak a nagkayamkam ti apoy agingga kadagiti ka-dekket na a babbalay, nga agpapada a naaramid ti light materials.
Segun kenni Gaetos, nangrugi ti uram iti balay ti managan Marlon Villanueva ken nairaman a dimmapo iti innem pay a babbalay. Dua iti partially damaged.
Pakabuklan a 12 a pamilya wenno 25 nga indibiduwal ti napukawan ti babbalay ken awan pulos naisalbar dagitoy nga arwaten ken kagawaan iti uneg ti balay, malaksid laeng ti suot dagitoy a kawes.
Walo nga ubbing nga agad-adal a pakairamanan ti maladaga nga agtawen ti 10 a bulan iti karaman a na-evacuate, ken temporaryo ita nga agnanaed iti evacuation center ti nasao a barangay.
Kabayatanna, dagus met a nangipaay ti tulong iti Local Government Unit ti Luna, agraman iti Provincial Government ti La Union kadagiti pamilya a biktima ti uram.
Agtultuloy ti imbestigasyon ti Luna Fire Station seknan ti pakabuklan a danyos dagirti nauram a babbalay.
Nupay kasta, awan ti nadangran wenno nasugatan kadagiti biktima.
Kabayatanna, nangipaay ti balakad ni Gaetos kadagiti umili tapno maliklikan ti uram.
Innayonna pay nga adda dagiti maangay nga aktibidades iti Luna Fire Station a kas panagselebrar da iti maika-32 nga anibersaryo dagitoy kas iti outreach program para kadagiti estudyante, ken clean-up drive.
